رەوشا وێژەيا دەڤكييا كورديا كورمانجي ل ئيرانێ

وێژەيا دەڤكي وەكي بەشەكە كەڤنەشۆپيا دەڤكي د درێژاھيا ديرۆكا كوردان دە يە ئەركا دبستانێن ئيرۆ پێك‌ئانيە. كوردێن كورمانج ل ئيرانێ د سەردەمێن بەرێ دە پڕتر ژيانا وان كۆچبەري و عەشيره‌تي بوويە، لەوما خيمێ دبستانان نەھاتيە ئاڤاكرن. وێژەيا وان ئا دەڤكي كاريە ب ئاوايەكي باش چاند، عورف، عەدەت و گەڵەك ھێلێن ژيانا وان بپارێزە و بگھينە ئيرۆ. ژ بەركو د سەدسالا بيستەم دە كوردێن كورمانج نكارين زمانێ خوە بكن ناڤا پەرگالەكەكە بەرفرەھ و گشتئالييا پەروەردەيێ، لەورە پێشكەتنێن ژيانا نووژەن ژيانا وان ژي سەرۆبني كر، ھێدي‌ھێدي ژ ژيانا كەڤنەشۆپيێ ب دوور كەتن. د ڤێ پێڤاژۆيێ‌دە، وێژەيا دەڤكي ژي كەت قۆناخەكە بەر ب ژێرێ و رۆژ ب رۆژ نفشێن نوو ژێ ب دوور دكەڤن. تەڤي كو ب گۆتنا گەڵەك كوردناسان وێژەيا كورديا كورمانجي يا دەڤكي دەولەمەندە لێ ھەيا ئيرۆ، نە لێكۆلينێن تێر و تژي سەر ھاتنە كرن، نە ژي نفشا نوو كاريە ڤێ چاڤكانيێ بكە خيمێ وێژەيا نڤيسكي. گرنگيا ڤێيا د ديرۆكێ دە ديار بوويە، ئەحمەدێ خاني مەمێ ئالان ا دەڤكي كريە خيمێ مەم و زين ا نڤيسكي. ئەڤ وێژەيا دەڤكي دكارە ئانەگۆري ئمكانێن ژيانا ئيرۆيين د وارێن جووربەجوور وەكي رۆمان، چيرۆك، شانۆ، سينەما و ھ.و.د. دن دە ببە چاڤكاني. ھەورھا، دكارە وەكي ئەركا خوە يا ديرۆكي، كراسێ نووژەن ل خوە بكە و ببە ھاندێرا ڤەژينا زماني سا كو پێشيا تێكچوونا زماني بگرە. بۆ ڤێيا ژي، ھەم دڤێ گرنگيا وێ ديار بە، ھەم رێكارێن بكارانينا وێ، ھەم ژي ئمكان و دەرفەتێن ھەيي وەرن نيشاندان كو لێكۆلينەر و پێكھينەر بكارن كارێن پێويست د ڤێ قادێ دە بكن.